A compañía presenta o espectáculo ‘Empatía’ este venres 25 en Covilhâ O Espazo de Danza da USC do Campus de Santiago estrea tempada este venres 25. Será no XV Ciclo de Teatro Universitario de Beira do Interior, que se celebra en Covilhâ (Portugal), onde presentará o seu último espectáculo titulado ‘Empatía’. Baixo a dirección artística de Juan Carlos Zahera, a peza contempla diferentes conversas no espazo e no tempo, a través das cales difunden a súa linguaxe en movemento. Trátase de tres relatos curtos independentes, pero conectados entre si, interpretados por nove bailaríns e con coreografía de Amparo Novas e música de Patricia Dallio e Win Mertens.

Pola súa banda, o Espazo de Danza do Campus de Lugo iniciará a principios de abril a súa tempada, na Mostra Internacional de Teatro Universitario (MITEU), co espectáculo ‘Próxima estación’. A peza é unha viaxe “que leva as raíces por maleta, pasando polo estado de globalización que nos envolve. Afirmando que nos queda un alento de esperanza e móvenos á necesidade de sentido e sensibilidade” segundo explican os creadores da peza. A obra está dirixida por Juan Carlos Zahera, director das compañías de danza da USC, e conta con texto de Mar Freire.

Fonte: http://xornal.usc.es