Aberto o prazo de matrícula ata o 27 de xuño para os curso de verán sobre turismo e sobre mantemento industrial

Continúa aberto o prazo de matrícula para os cursos de verán que impartirá este ano a Universidade da Coruña ata o 24 de setembro nos campus da Coruña e Ferrol, así como en distintos concellos da xeografía galega.
Ata o 27 de xuño está aberto o prazo de inscrición para o curso Tendencias e perspectivas do sector turismo no novo contexto económico-social, que se impartirá na Facultade de Economía e Empresa da UDC o 30 de xuño e o 1 de xullo. A finalidade deste curso é analizar o sector turístico na súa situación actual, co obxectivo de presentar as tendencias máis relevantes e os modelos e estratexias empregados polas empresas turísticas.

Tamén permanece aberto ata o 27 de xuño o prazo de matrícula para o curso Técnicas avanzadas. Mantemento industrial, que se desenvolverá o 30 de xuño e o 1 de xullo na Escola Universitaria Politécnica de Ferrol. O programa inclúe a presentación das novas técnicas de mantemento e ferramentas para a análise de equipos e a predición do funcionamento e fiabilidade das instalacións e infraestruturas (análise de vibracións, análise de aceites en tempo real, equipos electrónicos e informáticos), así como a introdución das técnicas máis avanzadas no campo da intelixencia artificial para a supervisión e predición do funcionamento das instalacións industriais.

Fonte: http://www.udc.es