A Universidade da Coruña recoñece como empresas asociadas cinco iniciativas de alumnos emprendedores.

O reitor, José María Barja, entregará mañá, xoves, 3 de novembro, os primeiros certificados de Empresas Asociadas da Universidade da Coruña a cinco iniciativas emprendedoras xurdidas pola iniciativa dos seus alumnos.
O acto de entrega do recoñecemento terá lugar na Sala de Prensa da Reitoría ás 11:00 horas e nel estarán tamén o vicerreitor de Ferrol e Relación Universidade-Empresa, Luís Barral, a directora da Oficina de Transferencia de Resultados de Investigación (OTRI), Pilar Pintor, e os responsables das empresas avansig, galebook, goovent, teimas e Trileuco. O certificado de Empresa Asociada á UDC recoñece a vinculación existente entre a entidade académica e estas iniciativas empresariais nacidas pola iniciativa dos seus alumnos. Todas elas están relacionadas co Viveiro de empresas que a Universidade ten no campus de Elviña e co que se fomenta a creación de empresas de base tecnolóxica ou de transferencia de resultados de investigación entre os alumnos, os profesores e o persoal de administración e servizos da UDC.

O Viveiro de empresas proporciona, ademais dun local e acceso a redes e servizos comúns, formación de xestión empresarial e apoio na procura de financiamento público e privado para desenvolver o proxecto empresarial. Os emprendedores admitidos na incubadora teñen que presentar un plan de negocio aos nove meses de estancia para saber se o seu proxecto é viable empresarialmente, tras o cal poden estar baixo o paraugas universitario un máximo de dous anos.

Fonte: http://www.udc.es