No transcurso dun acto no que participarán, entre outras personalidades, os reitores das tres universidades galegas, os alcaldes de Santiago e Lugo ou o director xeral de I+D+i.

Un total de oito institucións e entidades conformarán Redincuba, a Rede de Incubadoras de Empresas Tecnolóxicas e Innovadoras que promovida por Uninova presentarán este mércores 16 os reitores das tres universidades galegas. Conforman a nova rede a incubadora de empresas da USC (UNINOVA), a Universidade da Coruña, a Fundación Universidade de Vigo, Tecnópole-Parque Tecnolóxico de Galicia, a Cidade Tecnolóxica de Vigo (CITEXVI), a Fundación CEL, o Centro de Empresas e Innovación CEI-Nodus de Lugo e o Centro de Iniciativa Empresarial A Granxa do Consorcio Zona Franca de Vigo (CZFV-CEI A Granxa).

O acto de presentación comezará ás 12.30 horas no edificio Emprendia da USC(Campus Vida, s/n) coa presenza, entre outros, do alcalde de Santiago, Gerardo Conde Roa. Nesta sesión intervirán o reitor da USC, Juan Casares, en calidade de presidente de Redincuba; o da Universidade de Vigo, Salustiano Mato, en calidade de vicepresidente primeio; e o da Universidade da Coruña, José María Barja, como vicepresidente segundo.

A sesión rematará coa sinatura dos estatutos e da acta da asemblea constituínte de Redincuba por parte dos membros da xunta directiva. Así, ademais dos tres reitores, asinarán o alcalde de Lugo, José López Orozco, como presidente do CEI-Nodus; a delegada especial do Estado no Consorcio Zona Franca de Vigo,Mª Teresa Pisano, en representación do CEI A Granxa; o conselleiro delegado do Parque Tecnolóxico de Galicia, Ricardo Capilla, director xeral de I+D+i da Xunta de Galicia; o xerente de CITEXVI, Manuel Joaquín Aranda; e o presidente executivo da Fundación CEL, Luis García Santalla.

Fonte: http://xornal.usc.es/