A Facultade de Educación Física acolle unhas conferencias sobre estereotipos sexistas no deporte.

A Facultade de Ciencias do Deporte e da Educación Física acollerá nos vindeiros días novas conferencias enmarcadas nas actividades de conmemoración do 25 aniversario do centro. Trátase do III Ciclo de Conferencias sobre “Xénero, actividade física e deporte”, que inaugurará a vicerreitora de Estudantes, Deportes e Cultura, María José Martínez hoxe 16 de abril, ás 10:30 horas no salón de actos deste centro da Universidade da Coruña.

A relatora que abrirá o ciclo de conferencias será Adela Mirás Calvo, licenciada en Ciencias da Educación Física e do Deporte, profesora de Educación Física e directora do CEIP Cova Terreña, en Baiona (Pontevedra), que falará sobre “Estratexias para a eliminación de estereotipos sexistas”.

Xa ao día seguinte, o 17 de abril ás 11:00 horas, o profesor do departamento de Historia Contemporánea da Universidade de Santiago de Compostela, Andrés Domínguez Almansa, falará sobre o tema “Modernidade e xuventude: os inicios da muller no deporte. Da Galicia fin de século á Guerra Civil”.

Fonte: udc.es