Oficina CEER
 17-09-2008
Semana Europea das Rexións e das Cidades - OPEN DAYS 2008

Con motivo da Semana Europea das Rexións e das Cidades - OPEN DAYS 2008, Galicia participa como membro do Consorcio das Rexións Celtas formado por Asturias, Escocia, Gales, Norte de Irlanda e Sudoeste de Inglaterra, Rexións irlandesas, Bretaña e Norte de Portugal.

Neste contexto, a Dirección Xeral de Investigación, Desenvolvemento e Innovación e a Secretaría Xeral de Relacións Exteriores da Xunta de Galicia en colaboración coa Oficina de Programas Internacionais de I+D+i (OPIDi) e a Fundación Galicia Europa, están a organizar un acto descentralizado en Ferrol, que terá lugar o martes 14 de outubro, baixo o título “Oportunidades para os Axentes Galegos en Europa: I+D+i para un Desenvolvemento Sostible”.

O evento, inaugurado polo Director Xeral de I+D+i, Salustiano Mato de la Iglesia, xunto co Secretario Xeral de Relacións Exteriores da Xunta de Galicia e Director da Fundación Galicia Europa, Julio César Fernández Mato, ten como obxectivo presentar ás entidades galegas os Programas Europeos de I+D+i no ámbito do medio ambiente, o cambio climático e a ecoinnovación. Os temas a tratar serán os seguintes:

- Plan de Acción de Tecnoloxías Ambientais (ETAP). - VII Programa Marco da UE: Medio Ambiente (incluído Cambio Climático). - Implantación de EMAS: Ecoinnovación e ECAP. - Plataformas Tecnolóxicas relacionadas co Medio Ambiente.

No arquivo achegado podedes atopar o programa da xornada e o boletín de inscrición. Se estades interesados en participar, tedes que enviar o citado boletín ao enderezo electrónico promocion@opidi.org ou por fax ao número 981 33 71 71.
O prazo de inscrición remata o xoves 9 de outubro (aforo limitado).

Así mesmo, pola mañá ofrecerase a posibilidade de concertar entrevistas co Punto Nacional de Contacto de Medio Ambiente para a revisión de propostas. As entidades interesadas terán que enviar un resumo da mesma no formulario achegado a promocion@opidi.org, antes do xoves 9 de outubro.